சனாதன தர்மமும் சமகால அதர்மமும் ஒழியட்டுமே!

சனாதனமென்றால் எல்லாக் காலமும்

தர்மம் என்றால் நெறிமுறை

எல்லாக் காலத்துக்குமான நெறிமுறை

எல்லாக் காலத்துக்குமான வாழ்முறை 

சனாதன தர்மம்

நான்மறையிலில்லா வார்த்தை 

சனாதன தர்மம்

சமஸ்கிருதத்துக்குச் சொந்தமில்லா வார்த்தை

புத்தன் பேசிய பாலி மொழி வார்த்தை

‘தம்மோ சனாதன’

புத்தனுக்கு முன்னே அவனி்ன் நிலத்தில் 

பலரால் பயன்படுத்தப்பட்ட வார்த்தை

‘தம்மோ சனாதன’

காலத்தின் கடத்தலில் ‘தம்மோ சனாதன’

சனாதன தர்மமாகிறது

நெறி மாற்றப்பட்டு கருத்து மாற்றப்பட்டு

சமஸ்கிருதமும் ‘இந்து’ மதமும்

சொந்தம் கொண்டாடும் வார்த்தையிது

புத்தன் நல்வாழ்வு வழி

அன்பு அறநெறி தாங்கியவன்

மனக்கடலின் அலைகளை வென்றவன்

வார்த்தைகளை உருவாக்கியவனல்லன்

மொழியைத் தாங்கியவனல்லன்

வாழ்க்கையை குழப்பத்தின் வழியிலிருந்தும்

கடுங்கட்டுப்பாட்டுப் பிடியிலிருந்தும் விலக்கி

எளிமையின் பாதைக்கும்

அமைதியின் பாதைக்கும் 

கொணர முயன்றவன் புத்தன்

உண்மை மற்றும் அன்பின் வழியையே

எக்காலத்திற்கான வாழ்நெறியெனும்

சனாதன தர்மமென்றான் புத்தன்

பின்னொரு காலத்தில்

சமஸ்கிருதம் அந்த வார்த்தையை வென்றது

அதன் பழம் பொருளைத் தின்றது

இன்றதைத் தாங்குவது

வெறும் அரசியல்வியாதிகள்தாம்

மனு தர்மம் நால்வர்ணம்

தூக்கிநிறுத்தும் வெறும்பேதம்

இன்றின் சனாதன தர்மம்

அழிந்து போகட்டும்

சமுதாயத்தை பிளந்துவைக்கும்

சனாதன தர்மம்

இன்றின் கேள்விகளுக்கு முன்

பொடிப்பொடியாகும்

பேதங்களே நீங்கள் போய்வாருங்கள்

கடவுளருக்கும் 

நம்பிக்கைகளுக்கும்

பிறழ் சனாதனம் தேவையில்லை

மண்ணின் மைந்தர்களை

சரிநிகர் சமானமென

கொண்டாடா சனாதனம் 

அழியட்டுமே ஒழியட்டுமே!

கதைகளுக்குத் தேவை

பொய்கள் 

திரை விலகியபின் அவையெதற்கு?

பொய்ச் சனாதன தர்மத்திற்கு

விடை கொடுப்போம்! 

 

அய்யா அமீத்ஷாவும் அதிகாரத்தின் ஆன்மாவும்

 என் தாய்மொழி தமிழ். தமிழ் இனிமையான மொழி, பழமையோடு இன்றும் புதுமையாய் தெளிவாய் உள்ள மொழி. தமிழ் தனிமொழி, தனக்கென இலக்கணமும், பல இலக்கியங்களும் கொண்டு காலம் தாண்டி நிற்கும் மொழி.

தமிழைத் தவிர எனக்கு ஆங்கிலம் தெரியும். என் தொழிலுக்கு முழுதாய் உதவும் அழகிய மற்றும் மிக இலகுவான மொழி ஆங்கிலம். தொழில்நுட்பத்தில் முன் உள்ள மற்றும் உலக அறிவை ஒன்றாய் இணைக்கும் முக்கிய புள்ளியில் உள்ளது ஆங்கிலம்.

அவை தவிர, கொஞ்சம் கொஞ்சம் இந்தியும் எனக்குத் தெரியும். தூர்தர்ஷன், சித்திரகார் மற்றும் திரைப்படங்களின் மூலமாய்அறிந்து கொண்ட மொழி இனிமையான இந்தி மொழி. கொஞ்சம் கொஞ்சம் மலையாளமும், தெலுங்கும் தெரியும். எல்லா மொழிகளும் அழகானவைதாம்!

இந்தியா என்ற கட்டமைப்பினையும், பெரும் நிலப்பரப்பினை அறியவும், அதன் ஆன்மாவை புரிந்துகொள்ள இந்தி தெரிந்தாகவேண்டுமென இந்திய உள்துறை அமைச்சர் தெரிவித்திருப்பது எனக்கு ஏற்புடையதல்ல.

முட்டாள்தனமான, மற்றும் அதிகாரத்தைத் திணிக்கும் கருத்து அது. சிறு பிள்ளைகளுக்குக்கு அந்த இந்தியைத் திணிக்கும் நேரத்தில் உடற்பயிற்சியோ தொழிற் பயிற்சியோ கற்றுத்தந்தால் அவர்கள் மனமும் மகிழும், நாடும் நலம்பெறும். தேவையில்லாத மூன்றாவது மொழி எதற்கு?

கடவுளிடம் பேச சமஸ்கிருத்தால் மட்டுமே முடியும் எனும் ஆதிக்க வெறித்தனத்தைப் போலத்தான் இந்த ஆன்மாவை அறிய இந்தியால் மட்டுமே முடியும் என்ற பொய்க் கருத்தும் உள்ளது. கடவுள் ஒரு அனுபவம், அதற்கு பேச எந்த மொழியும் தேவையில்லை. அதுபோல் தான் இந்தியாவின் ஆன்மாவை அறிய இந்தியால் மட்டுமே முடியுமென்பது பெரும் பொய். வடக்கில் பாலியும், பிராகிருத மொழிகளும், தெற்கில் தமிழும் திராவிட மொழிகளும், அறியாததை இந்தியால் மட்டுமே அறியமுடியமென்பது ஏமாற்றுவேலை! 

இது போன்ற பேச்சுக்களுக்கு ஆதாரம் கிடையாது. தயவுசெய்து நிறுத்துங்கள்!