பம்பாய் தொடர் கொலைத் தாக்குதல்

பம்பாய் தொடர் கொலைத் தாக்குதல்.

இன்னும் ஒரு முறை இன்று மும்பையில் தொடர் கொலைத் தாக்குதல் மதத்தின் பெயரால் கட்டவிழ்த்து விடப்பட்டிருக்கிறது. இதுவரை நூற்றுக்கும் அதிகமானோர் இறந்திருக்கின்றனர், இருநூற்றிற்கும் அதிகமானோர் காயமடைந்திருக்கின்றனர். இதுதவிர, எண்ணற்றவர்கள் இதனால் பாதிக்கப்பட்டிருக்கின்றனர். 'இந்த வன்செயல் முழுமையாகக் கண்டிக்கத்தக்கது!'

இதுவரை பொதுமக்கள் உலாவும் கடைவீதிகளையும், கட்டிடங்களையும் குண்டுவைத்துத் தாக்கியவர்கள் இந்த முறை வெளிநாட்டவர் அதிகம் புழங்கும் தாஜ், ஓபராய் போன்ற இடங்களில் துப்பாக்கி தாங்கிய தீவிரவாதத் தாக்குதலாக நடத்தப்பட்டிருக்கிறது. தேசிய அளவில் மட்டுமல்லாமல் உலக அளவிலான கவனத்தை முழுமையாகப் பெறும் எண்ணத்துடன் திட்டமிட்டு செய்யப்பட்டிருக்கும் இந்த தாக்குதலை நடத்தியதற்கான காரணம், 1992 டிசம்பர் ஆறாம் தேதியன்று அயோத்தியிலிருந்த பாபர் மசூதியை இடித்த நிகழ்ச்சியின் தொடர் விளைவான மத வெறுப்பே எனத் தெரியப்படுத்தப்பட்டுள்ளது.

முஸ்லிம் தீவிரவாதக் குழுக்களும், பாகிஸ்தானியர்கள் மற்றும் பாகிஸ்தானில் பயிற்சி பெற்ற குழுவினர்கள் துப்பாக்கியைத் தாங்கி இந்த தாக்குதலை நடத்தியிருக்கின்றனரென்று கிடைக்கப்பெறும் தகவல்களிலிருந்து தெரியவருகிறது. காரணம் எதுவாயினும் இத்தனை பேரைக் கொன்ற, பலரின் உயிருக்கும் நலனுக்கும் பேரிழப்பை ஏற்படுத்தியுள்ள இந்த வன்செயல் முழுமையாகக் கண்டிக்கத்தக்கது!

கொன்றவர்கள் முஸ்லிம் தீவிரவாதிகளாயிருந்தாலும், இறந்தவர்கள் வெறுமனே இந்துக்கள் மட்டுமல்ல, மற்றெல்லா மதத்தினரும்தான். இந்தச் செயலால் நாடு முழுவதும் அதிர்ச்சியில் நின்றுகொண்டிருக்கின்றது. இன்னமும் தீவிரவாதிகளால் சிறைப் பிடிக்கப்பட்ட பிணைக் கைதிகளை விடுவிப்பதற்காக தேசிய பாதுகாப்புக் குழு படைவீரர்கள் போராடிக் கொண்டிருக்கின்றனர்.

திரும்பிய பக்கமெல்லாம் இந்தியத் தொலைக்காட்சிகளில் இது ஏதோவொரு திரைப்படச் சண்டைக்காட்சியைப் போல, மக்கள் பயத்தில் ஓடி ஒளிவதையும், வீதிகளில் குப்பையாய் இரத்தத்தில் வீழ்ந்து கிடப்பதையும், இறந்த உடல்களை தரையிலிழுத்துச் சென்று அப்புறப்படுத்துவதையும் திரும்பத் திரும்ப ஒளிபரப்புவது, தகவல் தரும் தேவையையும் நோக்கத்தையும் தாண்டி மக்களிடையே பயத்தையும் கோபத்தையும் உண்டாக்கும் விதத்தில் இருப்பது வருந்தத்தக்கது, கண்டிக்கத்தக்கது. இவர்களின் வியாபாரத்திற்கு இதையும் ஒரு நிகழ்ச்சியாக மாற்றுகிறார்களென்பது மிகவும் ஆபத்துக்குரியது. மதத்தை விற்றுப் பிழைக்கும் அரசியல் கட்சிகள் ஏற்கனவே இதில் என்ன ஆதாயமென்று தேட ஆரம்பித்துவிட்டன.

துப்பாக்கி தாங்கியவர்கள் டெக்கான் முஜாகுதீன் (புதிய குழுவினர்) எனும் முஸ்லிம் தீவிரவாதிக் குழுவென்று அடையாளம் காட்டப்பட்டுள்ளது. 1992இன் பாபர் மசூதி உடைப்பின் தொடர் நிகழ்வாக வளரத் துவங்கிய இந்து முஸ்லிம் மத வெறிப்பகையின் உச்சமாய் இன்றைய தாக்குதல் உள்ளது. இந்த பிரச்சினையை மனிதாபிமான அடிப்படையில் அணுகாமல் மத வெறி நோக்குடன் அதிகார வர்க்கமும், அரசியல்வாதிகளும், ஊடகங்களும் அணுகினால் இந்த முற்றுப்புள்ளி வரவே வராது. மேலும், கொல்லும் இந்தச் சிறு வெறிக்கும்பலினால், முஸ்லிம் விரோத மனப்பாங்கு வருங்காலங்களில் நேரடியாகவும், மறைமுகமாகவும் ஊடகங்களில் இன்னமும் அதிகமாய்த் தூண்டப்படுமென்பதே இதன் முக்கிய வருந்தத்தக்க விளைவாகும். பின்னாளில் நடைபெறவிருக்கும் இன்னொரு துயர நிகழ்விற்கு இது அடிகோலியிருக்கிறது.

தீவிரவாதத்தையும் தீவிரவாதிகளையும் மக்களிடமிருந்து தனியே பிரித்துப் பார்ப்பதுதான் வருங்காலங்களில் இதுபோன்ற நிகழ்வுகளைத் தடுக்க உதவும் ஒரே வழி. ஆயுதம் கொண்டவர்களை அழிக்க முடிந்தாலும், பின்னாலிருந்து இவர்களை ஆதரிக்கும், தூண்டும் கும்பல்களை எந்த அரசாங்கத்தாலும் அழிக்க இயலாது. இந்து மற்றும் முஸ்லிம் மதப் பெரியவர்களை ஒன்று கூட்டி பல சுற்றுப் பேச்சுவார்த்தைகளை நடத்துவதுடன், சமூகத்தில் அடிமட்டத்தில் பாதிக்கப்பட்டுள்ள இரு தரப்பினருக்கும் அரசின் மூலமாக அவர்களின் குறைகளை நீக்கும் மக்கள் நலத் திட்டங்கள் துவக்கி அவற்றிற்கு செலவு செய்யவும் மத்திய அரசு தயாராக இருக்க வேண்டும். தீவிரவாதத் தடுப்புப் பிரிவினருக்கு செலவு செய்வதுபோல் பலமடங்கு இந்த பொது மக்கள் பங்கெடுப்பு நிகழ்வுகளுக்கு செலவு செய்தாக வேண்டும்.

அரசியலில் மதத்தைக் கலக்கும் மத வெறியாளர்களிடமிருந்து இந்த திட்டத்தை காப்பாற்றவும் அதிகாரத்திலுள்ளவர்கள் முன்வருவதுவும் முக்கியத் தேவையாகும். இது போன்ற ஒரு செயல் திட்டத்தினை செயல்படுத்திட ஆட்சியிலுள்ளவர்கள் முன்வருவார்களா?